Asteartea, 2015eko uztailak 7a.
Kataluniatik
Euskal Herrira bizikletan, aldarrikapen giroan.
Arritxu Iribar, Oinatz Mitxelena, Lierni
Lekuona, Iban Gartzia, Jon Bikendi eta Naia Alzola, atzo, egitasmoaren
aurkezpenean. JUAN CARLOS RUIZ / ARGAZKI PRESS.
Unai Zubeldia. Donostia.
Tourrarekin eta Giroarekin bat eginda, Euskal Herriko eta Kataluniako
hainbat kirolarik autodeterminazioaren, independentziaren eta bi herrialde
horietako selekzioen aldeko aldarrikapena egingo dute uztailaren 11tik 14ra.
Bizikleta gainean egin ere. Portboutik abiatu eta Hendaiara iritsi artean, 942
kilometro egingo dituzte lau egunean, eta 26.800 metroko desnibela pilatuko
dute. Jon Bikendik eta Iban Gartziak osorik egingo dute ibilbidea, eta beste
bost txirrindulari izango dituzte ondoan: Oinatz Mitxelena, Iban Ruiperez,
Eduard Sadurni, Eugeni Serret eta Josep Negre. «Hori bai, guztiz irekia da
egitasmoa, eta hala nahi duten guztiek gurekin bat egiteko aukera izango dute
ibilbidean zehar».
Iaz, Gure Esku Dago dinamikak antolatutako giza katearekin bat eginda, Euskal
Herriko zazpi hiriburuak elkartu zituzten Bikendik eta Gartziak. «Eta
Kataluniako egoera politikoa aztertuta eta independentziaren alde sortutako
mugimenduarekin, bi herriak batu eta, aldarrikapen giroan, erronka hau egiteko
momentu ona zela pentsatu genuen». Hala azaldu zuen atzo Gartziak berak. Kirol
erronkak 30 bat elkarteren babesa jaso du, eta tartean dira, besteak beste,
Kataluniako eta Euskadiko Txirrindularitza Federazioak.
Uztailaren 13rako deia.
Datorren larunbatean abiatuko dira, 10:00etan. «Eta orduko 15 kilometroko
abiaduran ibiliko gara. Hau ez da txapelketa bat, eta helburua ez da marka
egitea». Pailheres, Agnes, Portet de Aspet, Bales, Peyresourde, Azet-Vallouron,
Hourquette d'Anzizan, Tourmalet, Aubisque, Marie Blanque, San Martin harria...
Pirinioetan barrena, mendate erraldoi asko igaro beharko dituzte 942
kilometroko tartean. «Geratu gabe ahalik eta kilometro gehien egiten saiatuko
dira; 500-600 ahal dela. Eta bizpahiru orduko atsedenaldiak egingo ditugu».
Uztailaren 14an Euskal Herrira iritsiko da Tourra, eta bezperan aldarrikapen
txiki bat egingo dute San Martin harrian, 18:00ak aldera. «Tourra ikustera joango
diren zaleei dei egiten diegu egun horretan gurekin bat egin dezaten».
Ibilbidearen amaieran, Hendaian, beste ekitaldi bat egingo dute.